لا تتكلم بالتلفون وانت تسوق

اتصال متوقع بين النائبين الدكتور يوسف الزلزلة وعلي الراشد بعد فضيحة تزوغل وزير الداخلية على الامة ونوابها في قضية احالة عقد اعلانات انتخابات 2008

ملاحظة : المتوقع ان يكون النائبان يجريان الإتصال وهما يقودان سيارتيهما في الشارع كل على حده

الزلزلة : الو بوفيصل شلونك

الراشد : هلا دكتور الحمد لله بخير

الزلزلة : بوفيصل شفت اشسوى فينا وزير الداخلية ؟

الراشد : اي والله وهقنا الحين اشلون انرقع له ؟

الزلزلة : والله ما ادري خل انفكر له بسالفة نطلعه منها مثل ما وقفنا وياه بالاستجواب وقفة ما يحلم فيها

الراشد : والله انك اهبل اهبـــــــــــــــــــــــــــل

الزلزلة : أفأ يا بوفيصل ما هقيتها منك

الراشد : لا لا لا يا دكتور ما أقصدك العفو هذا راعي وانيت كع بيرك جدامي فجأة

الزلزلة : اهااااااا اشوه اي بوفيصل ما قلت لي الحين شلون نطلع ونطلّع الحكومة من هالوهقة ؟

الراشد : يا أخي هذيل صج جحوش ما فيهم واحد يفتهم

الزلزلة : لا يا خوي يا بوفيصل مو لهالدرجة هذيل هم اخوانا وقاعد يجتهدون في عملهم بالي يقدرون

الراشد : لا لا يا بوحسين ما كنت اقصد الحكومة محشومين انا اقصد هذيل الي قاعد يعبرون الشارع جدامي وفوقهم جسر المشاة

الزلزلة : اي انا اقول مو عوايدك تسب الحكومة يا بوفيصل

الراشد : لا لا يا دكتور انا اسب الحكومة ؟ انا خلاص اخذت قراري وطريجي مع الحكومة من اليوم ورايح انا وياهم بخندق واحد

الزلزلة : صج انك ثور

الراشد : اوف !! دكتور انا تقول عني ثور ؟

الزلزلة : لا لا يا بوفيصل ما اقصدك محشوم هذا واحد راعي همر نام علي بغى يصعدني الرصيف

الراشد : الحين انا خايف يجرّون وزير العدل للمسائلة و موبعيدة رئيس الوزراء بكبره يتعرض للإستجواب لانهم كانوا

على علم بان العقد ما احيل للنيابة بقضية تحمل رقم وتاريخ وفيها اتهام واضح لأحد الأطراف ومع هذا غطوا على وزير الداخلية فعلته الي الحين بتوهقهم كلهم

الزلزلة : يا أخي صج بقر

الراشد : لا يا دكتور مهما كان لا تقول عنهم هالكلام الهون ابرك ما يكون

الزلزلة : لا بوفيصل انا كنت اقصد هالهنود الي موقفين تاكسي جوال بنص الشارع ومسكرين الحارة اليمين

بس اشلون حركة الوزير طافت على النواب كلهم ولا احد انتبه ؟

الراشد : تبي الصج هذيل كلهم مفهّين وومخوخهم مصينة

الزلزلة : بوفيصل النواب لهم الظاهر تلومهم ليش وثقوا بالوزير ؟

الراشد : لا لا انا اقصد الي راكبين باص المواصلات الي يمي بهالحر وبدون تكييف وسيتي باص اشزينة واقف وراهم

الزلزلة : انزين بوفيصل ما قلت لي الحين شالدبرة شنسوي علشان نطلع الوزير منها ونبرر موقفنا الذباح معاه الي آخرتها طلعنا احنا بالشينه

الراشد : خل هالصخلة ويا رفيجاتها الثلاث يتحركون شنو ماكو غيرنا هني ؟

الزلزلة : ليش يا خو متحامل على خواتنا النائبات تراهم مساكين وخبرتهم قليله اول مرة يدخلون المجلس تبيهم يحلون قضية بهالحجم ؟

الراشد : لا ما كنت اقصد النائبات هذيل اربع بنات بكامري يتمشون عالراحة والشرطي يأشر لي انا يقول لي حرك ما تشوفهم ياي علي انا ؟

الزلزلة : انزين اشرايك ناخذ راي خلف دميثير ونشوف شيقول يمكن عنده راي ؟

الراشد : ابي اعرف تنكر المجاري هذا اشفايدته ؟

الزلزلة : لا يا بوفيصل ما يجوز هالكلام مهما كان زميلك الظاهر ليلحين شايل بقلبك عليه لما حذفك بالقلاص ؟

الراشد : لا لا اعوذ بالله ما اقصد بومشعل هذا تنكر صجي واقف يسحب المجاري من البواليع بالله هذا منظر حضاري ؟

كل الدول تستخدم الصرف الصحي واحنا ليلحين على التنكر الأخضر

الزلزلة : يبا اشرايك نصف معاهم والي فيها فيها ؟؟

الراشد : انت من صجك دكتور بعد هالصخام الي سويناه وهذا الدفاع المستميت عن الوزير وكشفة الراس تبينا نصف ويا الي طلبوا طرح الثقة ؟!!!ء

الزلزلة : لا لا دكتور انت اشفيك اليوم انا اكلم صاحبي الي وياي اقول له اشرايك نصف ممنوع الوقوف حالنا حال الي واقفين ع الرصيف الاصفر والاسود

الله لا يقول اوخر عن الحكومة اكو واحد يعض الإيد الي انمدت له يا بوفيصل ؟

الراشد : خلاص يلا اقلب ويهك

الزلزلة : بوفيصل اكيد تقصد واحد بالشارع مضايقك ولا لاف عليك

الراشد : لا هالمرة اقصدك انت صار لي ساعة صافط عند البيت بنزل اتغدى وانت مجلب فيني وقاعد تسولف

:)