حصاد الاسبوع المرّ

ما ادري شنو بين الخرافي وبيني ؟

في جلسة الفلوس كما سمتها الصحافة صار سجال بين الخرافي والصرعاوي

الخرافي : لي صرت مكاني سو الي تبيه

الصرعاوي : ان شاء الله و مو بعيدة على الله

الخرافي : لا بعيدة

الصرعاوي : اسحبها ترى هالكلمة ..... وما ادري شقال ما سمعته عدل بس كان مبين يبي يقول كفر بس مو قادر

وانا انقهرت مو لان الخرافي كفر لاني ادري انه ما كان يقصدها بهالطريقة كان يقصد بعيدة انك تصير مكاني فانا انبطت جبدي شفيه الخرافي وايد متفرعن ومايبي احد حتى يفكر في الرئاسة مجرد تفكير

بعدها تكلم احد الاعضاء جان يصفق الجمهور الي على يمين الرئيس وانا كنت قاعد على يساره ومحد من صوبنا صفق ابداً

الخرافي : يلتفت صوبنا احنا الي ما صفقنا ويقول جمهور رجاءً لا تخلوني اتخذ .... ء

آنا : هذيل الي صفقوا مو احنا وأئشر على الصوب الثاني

الخرافي : لا انتوا الي صفقتوا

آنا : لا يبا أهم الي صفقوا

جان يضحك الخرافي ويضحك الي حواليّ

اليوم تفاجئت بأحد الأصدقاء يقول لي حاطين صورتك بالقبس جان اشتريها ولا صج حاطين الصورة وانا قاعد اناجره

ما ادري الظاهر كان حاس ان انا الي مسوي بوست الخرافي من المهد الى المطرقة الي تحول ايميل وكان ناوي يطردني

طبعا لو انا مو مغمض وحاط ايدي على نص ويهي جان ما حطيت الصورة

:)

---------------------

الحبايب الي صوتوا ضد تعديل المادة الاولى من قانون زيادة الخمسين الي اقترح فيها رفع السقف الراتب او الغائه تماماً

ابشركم ذنوبكم طاحت

عدنان ولاري

ثلاث قضايا شعبية تصوتون ضدها ويفرق فيها صوتكم والامر فيه انّ

-------------------

ابي واحد سيبويه يطلع عنده اثول باللغة العربية يفهمني الي مكتوب ؟؟؟

-----------------

منو هذا ؟؟؟

لا لا مو دعيج الشمري

هذا شبيهه وهو احد العاملين بالمجلس

ودعيج كان يقول له اذا انا ما ييت الجلسة انت احضر بدالي

الي صار ان دعيج طلع من المجلس وشبيهه باقي

ما ادري من حسن حظ المجلس ولا من سوئه ؟

يادي الخمسين

ما تمرمط رقم عندنا مثل ما تمرمط الرقم خمسين

بيزيدونا 50 ما يبي يزيدونا 50

حلوا المجلس بسبة ال 50 لأ ما حلوا المجلس بسبة 50

نزيد كل الموظفين 50 لأ ما نزيد كل الموظفين 50

نحط سقف لزيادة ال 50 لأ ما نحط سقف لزيادة ال 50

ال 50 تطلع من النواب يمشي فيها النواب يعدي فيها النواب يباصونها النواب , النواب يمررون ال 50 للجنة التشريعية اللجنة التشريعية ترفعها للجنة المالية المالية هات وخذ مع المجلس المجلس يشوت ال 50 لكن الحكومة تصد ال 50 والجمهور يغني نهير يا حمار شكو ؟ بعد جمهور العربي وليس على جمهور الاخضر حرج

واليوم طالعين لنا طلعة في تحديد الفئات المستحقة للخمسين حسب سقف الراتب اذا الموظف راتبه الف يلف ويها عن الزيادة لف واذا اقل من الف ياخذها ويلفها التجار منه لف

انا عندي اقتراح وتقسيمه للشرائح المستحقة لزيادة ال 50 المذلة او خل نسميها الزيادة المشابهة لمعاش الخادمة بعد السنتين

وهذي التقسيمة تكون كالتالي

الي ماعنده كرت السحب الآلي ودائما يتعامل مع الكاش ومتعود يروح البنك كل اسبوع ويسحب له الف ويحطهم ببوكه ويلف بوكه بسير او ما يتعامل الا بالشيكات

هذا ماله لا 50 ولا حتى 20 ويحمد ربه ان ما ناخذ منه مو نعطيه

======================

الي عنده كرت السحب الآلي بس مو حافظ الرقم السري وكاتبه على ورقة هذا اكيد مو محتاج وايد وما يجييك على حسابه

هذا زيادته عشر دنانير

=============

الي حافظ الرقم السري ورقم حسابه من اليمين الى الشمال ومن الشمال الى اليمين من كثر ما يدق على البنك

هذا زيادته عشرين

===============

الي حافظ رقمه السري ورقم حسابه ورقم الكرت

هذا زيادته ثلاثين

===================

الي حافظ رقمه السري ورقم حسابه ورقم الفيزا والماستر السري والرقم الي على الكرت ويقدر يسمعهم باي وقت

هذا زيادته اربعين

=================

الي من كثر ماهو حافي حافظ كل هالارقام وفوقهم ارقام فرع البنك والارقام الداخلية واسماء الموظفين والموظفات وعدد اولاد مدير الفرع وويعرف زوجته من بنته واسماء رياييل الموظفات وحافظ بدلاتهم وشحاطاتهم والحامل يعرف باي شهر ويعرف منو يطبخ احسن موظفة البنك ولا خدامتها ويعرف اسم البورتر البنغالي مال البنك ومجرب كل انواع القهوة الي بالفرع ويختم القران قبل كل سحب على جوائز البنك واذا دش الفرع ما يطلع الا من الباب الخلفي بعد نهاية الدوام ويحتفظ باوراق الرصيد ملوت سبع سنين طافوا ويعرف اذا رصيده ناقص خمسين فلس قبل ثلاثة اشهر ومطيح الميانة مع كل موظفي الفرع ويروح مخيم البنك السنوي ويدز رئيس مجلس الادارة بالديرفه اذا كان موجود

هذا يستاهل الخمسين كاملة وفوقهم بوسة

بذمتكم مو هالتقسيمة احسن من تقسيمة وشرائح اللجنة المالية

بس وين الي يفهم ؟

اشفيهم الكويتيين ؟

مثل ما الجو مأثر علي انا بأثر عليكم اليوم جنه الغبار مو كافي

اشفيهم الكويتيين ؟

الواحد منهم متزوج ثنتين وفوق هذا عنده صاحبه يطلع وياها ولي قطها على سيارتها وشاف وحده بالسايد الثاني تتلفت يقوم يلحقها وهو بالطريج وراها يدقون عليه المخفر صايدين سايقهم ويا فلبينية جيرانهم يروح يطورقه ويدوس ببطنه ويسفره

بشييييه انت متزوج وعندك صاحبه وتغازل بالله هالسايق الي صار له سنتين عندك واقصى اثارة مسويها هي شوفة قطاوة الفريج باوضاع مخلة تبيه شيسوي يعني ؟ يقضي هالسنتين صيام ؟

حتى الحريم الله ياخذ بعضهم اكرر بعضهم الاخت كويتية بنت ناس وعايلتها مسلمين مصلين ومسمين خوش اوادم وهي دارسة دين من اولى ابتدائي لي رابعة ثانوي وفوقهم تاريخ حضارة اذا خريجة جامعة او ثقافة اسلامية اذا خريجة تطبيقي

والاخت تخون زوجها وتطلع مع واحد سفلة مايخاف الله ولي ردت البيت بعد مغامرة تسود الويه تطيح على خدامتها المسيحية عندها موبايل تقوم تدق على الريل الووو بو فلان الحق خدامتك عندها موبايل وتييبه من دوامه والاخ يدوس ميتين ويوصل بدقيقتين و وينها وينها بنت الكلب ويركبها السيارة بدون حتى ما تاخذ اغراضها ويا المكتب يا المطار

انت شوف زوجتك هي الي يبيلها تسفيرالى جهنم مو المسيحية

والله الكويتيين يغثون

تروح الجمعية تمر عليك حرمة تخز عربانتك خزة جنك بايق هالاغراض من بيت ابوها مو شاريهم ناقص تجييك على تاريخ انتهاء الاشياء الي انت شاريها

والله الكويتيين شي مو معقول

كلهم يحبون الكشخة والشي الزين ولي شروا الشي الزين قالوا ويييع صار حلاو كل الناس شارينه بطلنا

عنبو دارك شاري بورش بعشرين الف وهم طايحة من عينك لان وايد بالشارع منها ؟؟؟

روح اشتر هاليكوبتر ماكو الا وحدة بالكويت

والله الكويتيين يبطون الجبد

كلهم يبيون يسافرون وكلهم يبون ديرة ما فيها كويتيين عيال الاكابر ليش هذيل يهود ولا عيال ديرتكم ؟

روحوا ترنداد وتوباغو يمكن تلقون مصاروة بس كويتيين ما راح تلقون

والله الكويتيين يقهرون

تمر وحدة على الرياييل لابسة مش ولا بد يطيحون فيها خز ممكن تنبلع ,,عادي انجذاب للنقيض وفطرة حتى خزتهم على استحياء وبدون لا يخلونها تحس بس خل تمر على الحريم يا بووويا يخزونها خزة التي يخلونها تحس بحكة مكان الخزة

بعد يقولون بالاعراس الحريم بس ناقص يجثحون زقاير ويطقونها جريمبة وهم قاعد يخزون الي قاعدة ترقص

والله الكويتيين عجيبين

الكويتيين كلهم اخر الشهر يصيرون ربع مطعم بدر البدور او مطعم شويخ السكنية ولي سولفت عن المطعم يقولون هذا المطعم وين صاير؟

استريييييييحوا الغرسون حفظ طلباتكم وقام من يشوف سييايركم سيدا راح ياب الطلب من غير ما تقولون

والله الكويتيين مو طبيعيين

الحريم بالدوامات بس باجة ما يتريقون لان الباجة لازم الاكل ارضي ولي ردت البيت تناجر ريلها ليش تطالع الحريم بالتلفزيون شالشفح الي فيك ؟ استريحي وغسلي الخضرة الي بين اسنانج اول

والله الكويتيين اينّنون الي ما ايّن

تصارخ على عيالها صراخ لو تصارخه على مقاول يبول بنفسه من الخرعه وعقبها على طول تلبس قميص نوم حق ريلها !!!!! عنبو دارج الريال صار فيه عقم بعد هالزئيروانتي تتميلحين ؟

والله ابتلشنا فيكم يا الكويتيين

بعض الكويتيين حفاي ويسافرون على قد ميزانياتهم يروحون سوريا ايران البحرين الخبر الدمام ما فيها شي كيفهم ما يبون يبون ياخذون قروض علشان يسافرون زين لي سألوكم وين بتسافرون ليش تجذبون والله ما ادري محتارين بين فرنسا واسبانيا

يلا اخذ انت ويهك ويه اسبانيا ؟

والله الكويتيين ما ادري شلون صايرين

ديرتكم احر ديرة بالكرة الارضية ويمكن احر ديرة بالمجرة بكبرها وثلاثة ارباع السنة يا غبار يا رطوبة ولي بغى يبيع بيته او ارضه يبي يبيعها اغلى من بيوت بيفرلي هيلز ليش انت شايف جيرانك عيالهم كل واحد عنده مكسيما مغيمة ومطول على الاغاني حده بالله انا اقط ربع مليون علشان هذيل يصيرون جيراني ؟

والوحدة منهم وزنها باقي له كيلو ويسجل بكتاب غينيس ولي طلع لها بيت تبي حمام سباحة وجاكوزي وسرداب وحوش ساقط وجرانييت واثاث من بره وتقط مفارش على الطاولات يعني كووول بالله اذا انتي تبين جذيه اللبنانية المزيونة شتسوي ببيتها ؟

مو حرام عايلة متروسة محلوة وكل وحدة من بناتهم احلى من الثانية كلهم عايشين بشقة فيها حمام واحد ويوقفون دور الصبح على الحمام وانتي عيالج هالجلحان كل واحد فيهم حمامه بداره جنه ولد هارون الرشيد لا وساقط بالعلوم بعد

والله الكويتيين يفرون المخ

يقطون ثلاثمية دينارعلى جنطة , خمسين دينار على نعال تكرمون , امية وخمسين على موبايل , خمس دنانير على سندويشه , خمستعش دينار على هاند فري , سبع دنانير على دلاغات , عشرين دينار على غترة

واييهم فقير يبي ربع دينار يقولون له روح اشتغل بدال هالطرارة الله ياخذكم اعتبروه جيس بنك

والله الكويتيين يشيبون الراس

يروحون مصر يصرفون الاف الجنيهات على رحلة باخرة واميات على مطعم او مسرحية او خيل وغيرهم يقطون على القمار الاف ويناجرون التكسي على خمس جنيهات ويوقفون بالشارع ساعة والا بيدقون على بوليس السياحة بعذر احنا ما ينقص علينا روحوا موتوا احسن

بس يظلون الكويتيين طيبين وقلبهم حنون

سوالف

ابي اسولف شوي

قانون المرور الجديد منع استخدام الموبايل بوضعه على الاذن فقط اما استخدامه عن بعد بالسبيكر غير مخالف والادهى كتابة مسج ايضا لا تستوجب المخالفة مع ان كتابة المسج هي الي تغث
انا توني شاري سوني اريكسون شاشته تش او لمس وما يكتب مسج عربي الا بالشاشة وبواسطة القلم والقلم ناسيه بالدوانية من امس فالي صاير ان وانا قاعد اسوق ابي اكتب مسج باللمس بدون قلم يعني باصبعي ونقش لان الحروف صغيرة وامس بغيت اهف لي صبي صغير واذبحه لاني الا بكتب مسج ويوم رفعت راسي ولا اشوف ياهل مجفس دشداشته وعابر الشارع ركض لانه منحاش من شي
المهم لو انا هافه لا سمح الله والصبي ميت جان تعال فجج وادفع دية وبوس خشوم علشان اهله يتنازلون بس هم ما راح يخالفوني
شفتوا شلون القانون قاصر ومو مدروس وما يعالج عيوب استخدام الموبايل بالسيارة
المفروض القانون الجديد يمنع ركض اليهال بالشارع وهم لابسين دشداشة ويجبرهم بلبس الشورت او البنطرون والا يخالفون اهل الصبي
عدل ؟
---------------

دواوين الكويت الي عروقهم بالماي بعد ما ايسوا من نتائج الانتخابات ودروا ان التحلطم مو قاعد اييب نتيجة كتبوا بيان يقال انه يحرض على ضرب الديموقراطية عبر حل المجلس حل غير دستوري
انا اقول الي سوه غلط المفروض يقترحون تعديل قانون الانتخاب بان يشترط على المرشح الكويتي بالتاسيس البالغ من العمر ثلاثين سنة ميلادية والمسجل بالقيود الانتخابية ان يكون حليقاً او املطاً او امردا
وكفى الله المؤمنين شر القتال
مو انتوا بغيتوا الدوائر الخمس وبعد تبون احزاب اكلوها
-----------------

حكومتنا الرشيدة المؤمنة بالدستور وبحق النواب الدستوري بالتشريع فيهم حساسية من زيادة الخمسين واعتقد ان لو يقترح النواب زيادة مئة دينار ما عندهم مانع بس خمسين لأ
انا اقترح عليهم انهم اييبون معاهم حبوب مسهلة و ما ان يعرض اقتراح الزيادة يلط اعضاء مجلس الوزراء الدواء ويجبلون الى الخلاء
والي مافيه شدة يوصل الى باب القاعة او ما يضمن نفسه ترى لافز زين وارخص من البامبرز
اما النواب السلف فهم ابطال الفيلم المقبل وهو

زيادة الخمسين لن تمر لانها تضر
------------------

اذا كانت موجة الغبار العاتية الي حايشتنا هالايام بسبب ذنوبنا ومعاصينا وسبب لتكفير الذنوب كما يلمح بعض الفضلاء من القوم فبشراكم يا اهل الكويت اذا استمر الجو هكذا الى يوليو المقبل فستصبحون كما ولدتكم امهاتكم وما له داعي تروحون الحج هالسنة

-----------------

عطلة مجلس الامة ثلاثة شهور والنواب بالمناسبة يأخذون رواتبهم عن هذه الفترة مقدماً
شفتوا شلون مستقبل الوظائف بالكويت في وظيفتين لا غير اما التدريس او التنحيس بالمجلس

---------------

هولندا مو راضين يردون على احد ومحد تارس عينهم وقاعدين يتعاملون مع الفرق بتعالي وبتمحَط وبدون اي تعاون
انصح رئيس الاتحاد الاوربي اذا استمر الحال هكذا بان يحل الاتحاد وان يعمل انتخابات مبكرة

او اييب حكام من ايران مثل ما يسوون ربعنا في بطولات كرة اليد
--------------

كريستيانو رونالدو هذا الزلمة الفلسطيني راح يروح ريال مدريد ويترك مانشستر لا محال اتمنى له ان يوفق في عقد جديد معاهم ويطق تذكرته ويسافر اسبانيا وتطيح الطيارة فيه ويموتون كل الي بالطيارة وبس هو يعيش ولكن يتحرول ويفقد الذاكرة وبعد عشر سنوات علاج يرد يلعب كرة بس قري مو لي جدام ويحترف بنادي المعاقين بالكويت ويفوز بالبطولة عندنا وتقرر له الهيئة مكافئة مالية ويضربها عليه امين الصندوق ويصيدونه بالمطار ويطلع محول الفلوس كلها مصر وتالي يقبضهم من الانتر بول المصري بالجنيه المصري ويحطونهم له بصندوق ولما يفتحه ولا ماكلهم الفار وبالاخير يصرفون له الشئوون معاش بس ما ينزلون بحسابه ثلاثة اشهر لان رقم حسابه بالبنك مو صحيح ولما يقبضهم كاش من البنك المركزي عند الباب يرميه حرامي بريوله وياخذهم وينحاش
-------------------

بعد وحش حولي طلع لنا وحش البلدية وجنه البلدية ناقصة وحوش علشان يطلع فيها وحش جديد عموما لو يصيربحث و تحري في باجي الدوائر الرسمية راح تشوفون ان في وحش الصحة و وحش الاعلام و وحش الداخلية ويمكن نلقى وحش البرلمان وضحاياه من النواب
----------------

الوطن عليهم الى الان 174 قضية سب وقذف وغيره لو يحصل ان يحكم عليهم بكل قضية دقيقة سجن اتوقع الناس بتقول الحين شبعوا بالناقلات ما نبيهم بس بردت جبودنا

----------------

اسعار النفط كل مالها وتزيد والاحتياطي كل ماله وينتفخ وجيوب الناس كل مالها وتفضى بسبب التضخم وغضبهم كل ماله ويشتد اتوقع مو السنة الياية لأ الي بعدها بنشوف مواطنين غسالين سيايير بمواقف المجمعات بس مو بقواري لان الكويتيين كشَيخة اتوقع بنشوفهم بسياكل وراح يغسلون سيايير البنات ببلاش على امل ان يقول لها في مجال؟

--------------

بعد انقطاع التكييف عن قطعتنا وبعدها انقطاعها عن المستشفيات اتمنى ان ينقطع التكييف عن البدع والضاحية والشامية والشويخ السكنية علشان تنحل ازمة الكهرباء بظرف اسبوع فقط لا غير

---------------

والي مافهم كلمة او جملة من الي قلته ترى السبب اني متلثم

مع السلامة

طشّار شكر

بعد النجاح الساحق الذي حققه بوستي الفائت فكرت في ان اعتزل التدوين من باب ان المبدع دائما ما يكون مطالب بالاعتزال وهو في قمة عطائه كما فعل لاعب النادي العربي فيصل بورقبة بالرغم انه ما اعتزل الا لما صلّع

اما فكرة البوست فلم تكن في ذهني ابداً فكل الذي اردت ان اعمله هو ان اكتب بوست يؤكد وجهة نظري السابقة في ان السيد جاسم الخرافي متجه الى المنصة بدون اي منافسة كما كنت اريد ان اوجه بوستي للذين كانوا يحاولون اما ان يوهمونا او يوهموا انفسهم بان المنافسة على منصب الرئيس ستكون شديدة وهم يعلمون تماما ان هذا الراي مجرد وهم ولم يحاولوا ان يتعاملوا مع موضوع الرئاسة بشكل اكثر فعالية فكانت ملاحظات عادل الصرعاوي للخرافي اكثر تأثير عليه وقد صرح الرئيس بان ملاحظات الصرعاوي محل تقدير علما بانها كانت من نائب واحد فكيف سيكون الامر لو اننا مشينا بهذا الطريق وهو ان نحاصر الخرافي بملاحظاتنا ونضغط عليه بان يصلح مواقع الخلل في رئاسته بدل الرهان الخاسر والفشيلة الي مالها داعي

ولكني كالعاده عرّيت بالبوست بعد ان بدأت فيه وكثيراً ما اعرّ واكتب غير ما انوي كتابته

وبهذي المناسبة احب ان اتوجه بالشكر لكل من اعطاني ثقته من خلال تعليقه على البوست ولكل من اشفق علي من هذه الثقة خصوصاَ من عودني على التواصل في هذه المدونة

واشكر كذلك كل الزملاء الجدد الذين لم اكن لاتعرف عليهم لولا اعجابهم فيه

واشكر ايضا الزملاء الذين اشرت اليهم انفا بانهم اوهمونا بالنافسة مما اثار حفيطتي والتي ترجمتها بالمدونة

والشكر موصول لبوعبدالمحسن الخرافي الذي اعطانا مادة دسمة للبوست السابق بشكل خاص والبوستات المتعلقة بالانتخابات بشكل عام

كذلك اشكر كل من ابدى اعجابه بالبوست سواء بالتعليقات او بالمسجات او بالاتصالات او بالايميلات

كما اشكر الاحتقان وعوار الصدر الي حاشني والذي منعني من التدخين في الايام السابقة مما ادى الى ان اعمل هذ البوست بوقت قياسي

ولا انسى بالشكر القائمين على السايت الرسمي لرئيس المجلس على ارشيف الصور الذي يحتويه الموقع وعلى كرمهم في جعل الصور متاحة للجميع

كما اشكر الراحل عبدالله السالم رحمة الله عليه على وضعه للدستور وتشريعه لان يكون هناك مجلس منتخب وان يكون للمجلس رئيس وان يكون للرئيس منتقدين وان يكون من المنتقدين مدونين

والشكر موصول لأسرة الخرافي ومحبيه ومناوئيه وكل من هم حواليه على تقبل النقد وعدم استأجار فداوية الهكرز المحترفين او حتى العليمية كي يعفسوا المدونة على حتى هذه اللحظة

ولا ننسى ان نشكر ناخبين الدائرة الثاني بدأً من الدوحة والصليبيخات وانتهاءً بالمنصورية والقادسية على هذا النصر المظفر لمرشحهم الغير شكل كما اننا نذكرهم بان الدور الذي سيلعبه رئيسنا ومرشحهم في الحياة السياسية المحلية المقبلة هو يا انه خال يا بوثنتين وفي الحالتين هم المسؤلين عن ذلك

اذا في احد ما شكرته بعد ذكروني لاني انا اليوم صاير مصري ما خليت احد

-------------------

خارج الموضوع

قبل اسبوع تقريبا الكهرباء في قطعتنا فقط خرفت وضرب المحول وما قام يشغل التكييف ولا الثلاجات بسبب احتراق فيزين من ثلاثة على حسب قول موظفي الطوارئ والامر تكرر ثلاث مرات خلال اسبوع واحد وكانوا يجيبون لنا مولد اضافي مكتوب عليه الخرافي ايضا ولكن المرة الاخير طنشوا وقالوا خلاص باجر نصلح العطل وتحملوا لي الصبح

والنتيجة كانت تقضية ليلة بدون تكييف فاصبح حالنا بالبيت كأنك داش مخيم بعرفات بالحج الاوادم مسدحين ويهفون على نفسهم

حاولت انام ماكو فايدة فمن القهر كتبت مسج الساعة سبع الصبح هذا نصه

هل يستطيع الانسان بالكويت في شهر يونيو ان يقضي يوما كاملا بدون تكييف ؟ اذا كان الجواب لا وهو منطقيا كذلك فللعلم اننا في قطعة كذا في منطقة كذا نجلس بدون تكييف وقد تكرر الامر اكثر من مرة خلال اسبوع

المطلوب هو فقط اعادة ارسال الرسالة الى وزير الكهرباء ونحن نراهن على انسانيته

ودزيت الرسالة الى مجموعة من نواب منطقتنا والله يرحك والدي الي حط ارقامهم بالمدونة

تدرون منو رد علي ؟

الوحيد الي رد علي هو وزير العدل والاوقاف رد برسالة الساعة ثمان الصبح يقول فيها كلمة حاضر

والساعة ثلاثة الظهر دق علي بس انا ما رديت عليه لان الكهرباء كانت راجعة وانا كنت نايم مثل القتيل

الحين تلومون الواحد لي عطى صوته لمرشح خادمه او مسوي له شغله

الي بيقول لي لو نحسن الاختيار البلد بتتسنع وما يصير فيها هالخمبقة وما تحتاج لنائب يتوسط لك

بقول له اقعد يوم كامل بدون تكييف بعدين تكلم

-------------------

وفي الختام ابعث برسالة الى كل من ينوي ان يسافر لقضاء فترة الصيف خارج بلدنا العزيز

والى كل المواطنين الشرفاء الذين هم خارج الكويت

رسالتي لكم يا اخواني الاعزاء هي ان لكم اخوان جحوش بالكويت ينادون بالسياحة الداخلية

فماذا انتم قائلون ؟؟

وتصبحون على برحي

الخرافي من المهد الى المطرقة

تحديث التحديث *

للي يسألون عن مصدر الصور نقول لهم

الصور مصدرها سايته الرسمي

ادري بتقولون يامن شرى له من حلاله علّه

---------------

تحديث *

نسيت اقول لكم ان كل المدونات الي كنت حاطها عندي بالبلوق اختفت بروحها

ما ادري ليش ؟

ما ادري شلون ؟

والي يعرف السبب يتكرم علينا فيه

.

من ايام الابيض والاسود وانا يراودني حلم معين

خل نتخيل هالورد هو اعضاء المجلس

.

وهذي الوردة هي الرئاسة شلون اقطفها ؟

قمت افكر

واسرح

وما ادري شقاعد يدور حولي

اييييييييه يا بوناصر كل ن بقلبه شقى الي له

ياخوي ذبحني التفكير قمت اسحك باكيتين باليوم واحس ان راسي بينفجر

احس اني تسبهت قمت اضحك شوي واطقها بجوة شوي

ويوم فاتحت هالمطفوق بقق عيونه وفضحني

.
قمت احسب له بالارقام اني اقدر اصير رئيس

.>.

.

وهذا اقول له انت شفيك ؟ ترى نشفت ريجي على هالصوت ماسوت علي

انت منو ؟

.

شوفوا يا جماعة , السر عندكم بالامان انا بصير رئيس المجلس بيوم من الايام
تصدق عبالنا عندك سالفة

.

طويل العمر خلك معاي شوي ..شقاعد تطالع هناك ؟

بوفهد انا بصير رئيس شقلت ؟

وانا شكو فيك صرت رئيس ولا ما صرت

دكتور تصدق اني مفكر بالرئاسة من يوم ماني هالكبر

لا الــه الا الله

مو تبين سبق هذا سبق انا قاعد اقول لج كلها ثلاثين سنة تقريبا واصير رئيس المجلس

.

لحظة صياح لحظة خل ادز مكتبي بعيد عنك لانك تفشل

صدقني يا محسن انا راح اصير رئيس في المستقبل

مو مصدقني انزين بس مو تييني علشان اتوسط لك اذا انسجنت

هاهاهاهاهاهاها

اتغشمر وياك شفيك اخترعت

يا جماعة الخير شفيكم اكيد هالعوضي مشيشكم علي

والله عاد ترفعون ايدكم تصارخون تضحكون علي سوّوا الي تسونه انا صاير رئيس صاير

الواحد عدنكم لي قال بصير رئيس جنه كفر

بس انا لكم اراويكم

انا انا بصير رئيس بعد جم سنة انا

اي علمني علمني شلون تكتب هالمذكرة

اقعد ويا دشداشتك جنك توم اند جيري لما كشخوا بالبيانو

عمي شقاعد تكتب شنو هذا ليش جذيه

جسوم يوز عني لا اهفّك راشدي يسنع ويهك

اقول لك خلني اقعد شوي بشوف شلون قايل احساس الرئاسة

هههههه مش بوزك حتى الحمام عناد عليك ماني رايح بأجله للبيت

ولا اخليك تقعد دقيقة

.

يبا انا رحت عند ربي ودعيت ولا منتكم

.

وكاني ناطر وان شاء الله دعوتي تنقبل

ايبااااه ما بغيت اصير رئيس

الحين عرفتوا مشواري السياسي

وشلون صرت رئيس

عبالكم السالفة سهالة ؟؟